ورشة عمل في الرقابة المالية بالتعاون مع البنك المركزي لتعزيز كفاءة الإفصاح الائتماني لشركات التمويل غير المصرفي

بقلم/نشأت البسيوني 

مع الوقت الانسان يلاقي نفسه مش هو نفس الشخص اللي كان من سنة او حتى من شهر يلاحظ انه بطل يفرح بالحاجات اللي كان بيحبها وبطل يزعل من اللي كان بيوجعه وبطل يهتم بالحاجات اللي كانت بتشغله ليل ونهار يحس انه اتغير مش باختياره لكن بسبب كل اللي مر بيه التجارب بتعيد تشكيل الروح الخذلان بيوجع

بس بيعلم والفقد بيكسر بس بيقوي والصدمات بتزعزع كل شيء

بس في النهاية بترتبك من جوه بطريقة عمرك ما كنت هتوصل لها لو ما عديتش عليها ولما تستوعب انك اتغيرت تبدأ تفهم نفسك اكتر

تفهم سبب جفافك وسبب هدوءك وسبب انسحابك وتفهم ان قلبك اختار يحمي نفسه بدل ما يتأذى كل مرة وان عقلك اختار يركز على حياته بدل مطاردة ناس مش شايفاك وتكتشف ان التغيير مش دايما مؤلم أحياناً هو خلاص خلاص من علاقات كانت بتستنزف

ومن توقعات كانت بتأذي ومن أحلام ما كانتش ليك من الأساس

ولما تقبل التغيير تحس براحة تحس انك واقف على ارض ثابتة

وان اللي زعلت عشانه زمانزما يستاهلش لحظة واحدة من وقتك دلوقتي وان اللي كنت بتدافع عنه ما بقاش له وجود عندك

وتبدأ تشوف الحياة بنضج وتتعامل بعقل وتحب بحذر وتدي بحدود

وتسامح بوعي وتبعد بهدوء تفهم ان التغيير اللي جه غصب عنك

كان لازم يحصل علشان يوصلك لنسخة اقوى اهدأ احكم واكثر وعيا نسخة تستحق الاحترام وتعرف قيمتها ومش مستعدة ترجع لورا ولا لمكان ولا لشخص كسرها قبل كده