بقلم/نشأت البسيوني
في لحظة معينة قبل ما تاخد قرار كبير في حياتك بتحس إن الدنيا بتقف ثواني كأن الزمن بيحاول يفكرك إن الخطوة اللي جاية مش مجرد حركة عابرة دي خطوة هتغير جزء من مستقبلك ويمكن جزء من شخصيتك نفسها اللحظة دي مليانة توتر وصراع داخلي بين صوتين صوت بيشدك للامان والعادة والمألوف وصوت تاني بيدفعك تخاطر وتجرب وتكسر الدائرة اللي محبوس فيها من زمان
ولأن القرار مش بسيط تلاقي قلبك وعقلك واقفين ضد بعض وكل واحد ليه منطقه وكل واحد بيقولك إنه الصح تلاقيك بتسأل نفسك اسئلة كتير هل انا جاهز هل الخطوة دي كبيرة علي هل هقدر اتحمل نتيجتها هل ممكن اندم ولا هفرح ولا هتغير بجد ولا هرجع لنفس النقطة بعد وقت بسيط ومع كل سؤال تلاقي جواك خوف طبيعي خوف من المجهول ومن الخسارة ومن الفشل بس مع نفس
الخوف تلاقي رغبة قوية في التغيير في الهروب من الروتين في انك تشوف نفسك في مكان جديد بيشبهك أكتر ويريحك أكتر ويفتحلك باب ماكانش موجود قبل كده والغريب إن اللحظة اللي قبل القرار ساعات بتكون أصعب من القرار نفسه لأنك فيها بتواجه كل قلقك كل شكك كل ضعفك كل رغبتك في الهروب وكل حلم جواك مش قادر يستنى أكتر لكن لما توصل للحظة اليقين اللحظة
اللي تحس فيها إنك اختارت الصح حتى لو الطريق مجهول ساعتها ترتاح لأن القرار مش دايما معناه اكتمال الفهم القرار ساعات معناه إنك مستعد تتعلم وأنك قبلت تخوض التجربة مهما كانت نتيجتها
وفي الآخر تكتشف إن أهم حاجة مش القرار نفسه أهم حاجة إنك ما تسيبش حياتك واقفة عند لحظة تردد وإنك تكون دايما شجاع كفاية تاخد خطوة لقدام حتى لو الطريق لسه مش واضح
تعليقات
إرسال تعليق