خطوة جرأة... الوطن اليوم ـ حصري 

بقلم/نشأت البسيوني 

في لحظة من لحظات الحياة تلاقي نفسك واقف قدام اختيار يحطك بين الخوف وبين اللي نفسك توصله بين حاجة مضمونة قدامك وحاجة نفسك فيها بس مش عارف نهايتها إيه اللحظة دي هي اللي بتكشف مين اللي بيتظاهر بالقوة ومين فعلا عنده قوة ومين اللي كل كلامه كان شعارات ومين اللي كل خطوة عنده فعل مش مجرد أمنية كلنا بنتكلم عن التغيير بس مش كلنا نقدر نتحرك 

تجاهه لأن الجرأة مش كلام الجرأة فعل الجرأة وجع في الأول ومكسب في الآخر الجرأة انك توقف نفسك وتقول أنا تعبت من الدور اللي بعمله ومن الهدوء اللي مش ليا ومن الطريق اللي مش بيوصل لمكاني الحقيقي الجرأة إنك تكسر الباب اللي متعود تدخله كل يوم وتدور على باب تاني يمكن يكون أوسع يمكن يكون أخطر لكنه أكتر صدقا مع نفسك ويمكن أول ما تاخد الخطوة تحس إن 

رجليك بتتهز لكن قلبك بيتأكد إنك أخيرا بتعمل الصح الجرأة مش إنك تكون جاهز لكن إنك تمشي حتى لو مش جاهز إنك تواجه حتى لو خايف إنك تقول لأ حتى لو كل الناس عايزة منك تقول أه إنك توقف حد بيقلل منك حتى لو بتحبه إنك تطلع من علاقة بتوجعك حتى لو كنت متعلق بيها إنك تبدأ من الصفر حتى لو الكل افتكر إنك بتنهي النهاية الجرأة هي اللحظة اللي تلاقي فيها عقلك بيقولك 

ارجع وقلبك يقولك كمل وروحك تتنفض وتقولك انت اتولدت عشان اللحظة دي اللحظة اللي تعرف فيها إنك مش مخلوق تعيش نصف حياة ولا نص سعادة ولا نص نجاح ولا نص انت الجرأة إنك ترفض العيش بنص قوة لأنك طول الوقت كنت مكبوت وطول الوقت عايش على هامش نفسك وكل ما بتمشي خطوة جواك بيكبر شويتين وكل ما بتواجه اللي مخوفك تكتشف إنه أضعف من اللي 

كنت فاكره بكتير وكل ما بتقرب من ذاتك الحقيقية تحس بقيمة عمرك وتعرف إنك ضيعت كتير على أشياء ما تستحقش خطوة الجرأة مش نهاية طريق لكنها بداية وعي بداية حياة جديدة حياة فيها حضور وصوت وثبات حياة تختار فيها أنت مش الظروف حياة تفتح فيها باب جديد وتدخل وانت عارف إنك مش هترجع تاني زي ما كنت لأن اللي اتجرأ مرة عمره ما يرجع يعيش في الظل تاني